特首林鄭月娥連日為首份施政報告諮詢各界意見，噚日朝早先會見曾因丁屋僭建問題同佢擘面開拖嘅鄉議局，下晝就約咗港區人大同政協委員，全國人大常委范徐麗泰、港區人大代表葉國謙、鄭耀棠等都有出席。葉國謙會後話席間有15個人有機會發言，佢自己就關注港珠澳大橋、提升港人公民意識及國情教育等議題，仲建議香港人都可申請中國公民身份證喎。至於一地兩檢呢個燙手山芋，席間冇具體討論，DQ議員一事亦未有觸及，引述林鄭比較關注有人提出嘅改變工廈用途建議。
啱啱入行會嘅鄉議局主席劉業強大讚林鄭細心聆聽意見，指政府當務之急係解決土地不足，如可將棕地嘅物流業搬上樓等，席間冇討論極具爭議嘅橫洲發展計劃。