徐菁遙（前名徐淑敏Suki）天生有口福，未嫁前有媽咪炮製住家菜；升呢人妻就有廚藝高手奶奶照顧，Suki只需要出得廳堂，沒需要入得廚房，直至她誕下三個囡囡，Suki就的起心肝到東京讀法國藍帶課程學煮法國菜，她日前就親自為本報的《我一個人煮》打響頭炮，親自示範金箔燉梨伴呍呢拿雪糕，不用半小時便把簡單啤梨變成豪門宴客甜品。
「伴碟都要跟足」
Suki一邊密密手示範，一邊分享入廚趣事，講到平時十指不沾陽春水的她學藍帶課程，她說：「大廚要求好高，佢哋都喺米芝蓮餐廳做過，我零廚藝經驗，當然成日會被鬧，有俾人鬧到喊㗎！我覺得自己好似好冇用，乜都唔識。大廚用詞苛刻㗎，佢哋想學生學成後，可以去到真正廚房工作，所以早少少畀大家嚴厲訓練。」
Suki直認是曳學生，因為有時沒跟足大廚步驟指示，她自嘲抵鬧：「我係門外漢，會覺得做咗出嚟就得，但大廚要求嚴格，即使伴碟都要跟足。」
甜姐兒Suki炮製甜品，秀色可餐，Suki也分享了夫妻恩愛秘密：「以噚日情況嚟講都好sweet。」至於冧夫絕招，她續說：「佢工作完返嚟，我會同佢講辛苦晒，我會問佢有乜嘢分享吓，又攬吓錫吓，咁佢知道咁辛苦返嚟有人等佢，老公有時應酬到凌晨3、4點返嚟，我未瞓都會等佢門，佢唔返嚟，我瞓唔着嘛。」Suki自爆有時大頭蝦，會忘記特別日子：「我用手機備忘寫低佢，又記埋食譜，就算老公對我唔好都有寫低㗎，全部備忘合共有五百幾個。」
金箔燉梨做法
採訪：陳杰
攝影：陳順禎
場地提供：Kohler Kitchens
鳴謝：H&M Home