中原銀行（1216）噚日上市，送咗件「國寶」畀港交所（388）。呢件好似一個鼎嘅東西，其實係一個壺，名為「蓮鶴方壺」，係中原所在地，河南省嘅重要文物，咁送畀港交所呢個，當然只係仿製品喇。
聽聞中原銀行為隆重其事，搵人一比一複製，方壺高118cm，口徑30.5cm。咁啱瑞強集團（8427）同日上市，瑞強送出嘅紀念品精緻好多，一比較，更覺方壺巨型。
據維基百科介紹，蓮鶴方壺（講緊真嗰個）原先係一對，係春秋時期青銅器代表作，被喻為「壺中之王」；1923年於河南省新鄭縣李家樓鄭公大墓中出土，其中一件藏於北京故宮博物院青銅館，另一件藏於河南博物院，亦係河南博物院嘅鎮院之寶，不得外借。
中原方面話，方壺「鶴立蓮上，振翅欲飛」，寓意銀行未來業務蒸蒸日上、步步輝煌咁話。
不過，港交所方面好似講過，如果紀念品體積太大，會收埋喺倉庫喎。