【本報訊】一直支持政府36億元教育新資源撥款的教育界議員葉建源，昨與同屬民主派、但狠批撥款令立會功能組別化的議員朱凱廸，罕有地隔空駁火。朱會上發言時稱，希望提醒議員，不能只向政府求取資源推動政策，卻不是由香港人決定資源如何分配；又質疑林鄭透過教育撥款，淡化取消民主派議員議席事件的影響。
朱：得到掌聲嘅係林鄭
朱凱廸會上發言時批評，政府透過控制資源運用，控制香港政治和教育發展方向，批評昨到立法會申請撥款的教育局局長楊潤雄「扮晒蟹」，「你根本係用36億去幫我哋做咗決定同答案，假惺惺！」又指上次林鄭月娥出席答問大會時，「長毛」提醒他要小心林鄭透過手段，令整個立法會功能組別化，令每個議員都只顧業界利益，「政府派少少畀你，你就只覺得要保住業界利益，忘記咗香港巿民根本上要爭取嘅，係資源分配要由香港人決定，唔係政府決定！」
葉建源發言時向朱還擊，認同資源分配應按人民意願進行的觀點，但亦指今次教育撥款中，「具體措施全部都係由教育界、民主派過去咁多年提出嘅建議」，認為外界毋須理解為官員的小恩小惠，又指今次撥款「實際上係來自人民嘅一個呼聲」。
但朱明顯不滿葉說法，再次點名反駁葉，指教育界對政府有提議是正常，「問題係實際上，邊個決定係咪接受（議員要求）？係對面嗰班人（官員）！」並指今次難稱得上是議員勝利，「巿民過程中有冇得到更大權力？明顯冇，得到掌聲嘅係林鄭」，質疑林鄭透過教育撥款去中和、淡化取消議員資格一事的影響。
■記者林俊謙