特首林鄭月娥上場後向班子落咗唔少單，據聞一眾問責局長都做到有氣冇碇唞，離開熱廚房嘅梁班子成員隔岸觀火，會唔會覺得走得合時免傷身？離開添馬艦，又唔等於從此引退嘅，原來2016年初先上任嘅創新及科技局前政治助理梁淑寶唔會過渡。前任行政長官及政治委任官員離職後工作諮詢委員會宣佈，梁淑寶周五起返番舊公司科瑉做營運總監，八方唔知創科局局長楊偉雄搵咗合適人選做政助未，只知梁淑寶未入政府前，就係喺呢間由民建聯前區議員全資擁有嘅公司任職。
而環境局前副局長陸恭蕙唔做官就跳返入學術界，委員會宣佈陸恭蕙前日起出任科技大學兼任教授，亦會喺下月起擔任WMA香港攝影比賽嘅獎項顧問。