【本報訊】銀行界出身的李振寧（Andrew）及李恢恢（Hui）2015年尾成立公司Ybex，希望提供一個透明公開的外滙格價平台，理念就似一般酒店、機票格價平台。公司今年2月始推出手機App YBPay，協助提供找換及滙款服務，幫用戶搵找換商。
行政總裁Andrew本身在投行從事外滙交易，講到唱錢去旅行，佢就有個唔係幾好的體驗，「我去本身個銀行問完個價之後，作為一個FX trader，佢畀呢個價，我就覺得有小小侮辱性嘅，所以我就去咗好出名嘅一間樓上嘅找換店，排隊排咗差唔多半個鐘，其實最終我可能慳咗30零40蚊，但就冇咗個lunch time。」
Andrew相信，有好多人都會同佢一樣，唔會想硬食銀行「侮辱價」，又唔想浪費時間格價、排隊，於是就同從事高頻交易技術工作的同事Hui，亦即Ybex技術總監，離開銀行，一同創業。
YBPay推出近半年，註冊用戶有近萬個，但大多數以使用滙款功能的外傭為主，而找換店合作夥伴暫時有30幾間，橫跨香港多個區。Andrew表示，陸陸續續將有更多找換店加入平台，以吸引更多本地香港人使用，「如果你喺上環，你搵到間喺大埔平20蚊嘅，冇理由嘥時間走入去嗰度唱錢，我哋想搵多啲partner入嚟，遍佈全港，梗有一間喺你附近。」
可先鎖定滙價 日內再唱錢
Andrew強調，他們並唔係一個找換商，而係一個平台，除咗滙價，平台仲會提供找換店嘅營業時間、地點等資料，又設有用戶評分制，幫用戶滙錢到外國或者換錢去旅行時，更方便搵到最合適的找換商。另外，外幣滙率瞬息萬變，平台讓用戶鎖定滙價，輸入兌換金額直接落單，而用戶需在該日內到找換店舖以現金交易。
據了解，Ybex獲得美圖（1357）的基礎投資者之一京基集團，作為種子投資者，投資了50萬美元，公司總融資額約150萬美元。Andrew指出，Ybex不會向用戶收費，現只向找換商收取象徵式手續費，公司正在增長階段，以擴大客戶群為主，未有盈利，現每月處理交易額過百萬元。他希望用戶數目今年可達到六位數字，短期將進軍新加坡及倫敦，而打好根基後，中長線目標是發展內地業務。
記者：曾木秀