即將於下季成為大摩馬房主帥嘅26歲澳洲藉騎師貝湯美，一直都係以青靚白浄示人，鬚根都唔見多條。不過近排佢就轉一轉新Look，留咗成面鬍鬚，啲佬味即時湧晒出嚟，變得更加成熟穩重。唔通因為Tommy仔遲吓嚟香港，展開其事業嘅新一頁，所以轉嗰新Look，賀一賀佢？
原來貝湯美留鬚係為咗一個名為「Bears of Hope Pregnancy & Infant Loss Support」嘅機構而籌款，呢個機構喺幫助一些因為難產而失去家庭成員嘅屋企。貝湯美就聯同一班騎師齊齊做出呢個充滿善心嘅舉動，而佢哋將會喺成個七月入面進行募捐。
貝湯美表示希望各位馬迷踴躍捐輸，仲講到唔會計較助籌嘅數目有幾多。經過近半個月時間，貝湯美嘅籌款已超越自己訂立嘅2,000澳元（折合12,000港元）嘅目標，現時已經去到近2,800澳元（折合17,000港元），Tommy仔仲喺Twitter感謝各位馬迷嘅付出。留鬚向大眾招攬善款嘅舉動，睇嚟相當有效。