早排熱普城玩大清算，熱血公民同國師陳雲嘅城邦派一齊喺網上清算教主黃毓民普羅政治學院嘅支持者，兩大陣營日日喺網上打生打死，而作為熱血唯一立法會議員嘅正白旗旗主鄭松泰，亦被爆內部講話批評教主，同皇上黃洋達、陳雲企埋同一陣線。但泰博估唔到嘅係，國師竟然咁快將清算矛頭指向佢身上。
話說泰博前日同朱凱廸一齊見記者講佢哋單DQ案，國師喺fb轉貼一則相關評論同埋兩人合照，再加一句回應：「站錯了。即使命運一樣，仇敵是不會站在一起的。」
國師言論一出，即刻引嚟一眾支持者熱烈回應，有人為泰博解釋，可能係咁啱兩個人一齊行出嚟，又俾記者捉住問嘢影相呢！點知國師留言話「要即刻彈開」、「朱凱廸對於熱普城的敵對，超過土共」、「判斷這個，其實不需要智力，需要的是道義」，睇到呢度都知國師可能連泰博都要清算。
至於班網民，除咗係咁貼「老師又中」揶揄之外，亦有花生友估係咪有人知泰博呢次DQ案輸多贏少，冇乜利用價值喇，所以藉機切割呢？