紅軍名宿麥馬拿文噚日喺香港出席活動，同一班小朋友踢波，傳授足球知識。展望紅軍，老麥話：「我認為沙迪奧文尼表現好好，可惜季尾受傷；菲臘比古天奴打得唔錯；法明奴經歷咗一個重大球季，啱啱加盟嘅穆罕默德沙拿都係不俗收購。」
花絮︰賓迪基結婚靜雞雞
英超球隊水晶宮因天雨取消噚日賽前操練，部份球員喺傍晚抽空出席喺灣仔一酒吧進行嘅球迷見面活動。另外，水晶宮前鋒賓迪基原來喺嚟香港前，靜雞雞同拍拖多年嘅女友科東妮結婚，賓迪基喺社交網站上載婚照，仲留言：「美女與野獸。」
花絮︰首日門票炒貴六倍
英超亞洲盃門票喺上周初開售後，24小時內極速售罄，雖然一票難求，但StubHub網站擔任中介角色之下，仍有兩個比賽日門票發售，截止周二晚上九時，首日門票尚餘49張可供發售（圖），價錢由980元至4,880元不等，以720元最貴門票計，足足炒高六倍。
