薛世恒人稱Neway大少，近年自立門戶外闖，涉獵投資，近兩年發展地產項目，當中在旺角重建的大型商場項目，將於下月面世。對自立或打理家族生意的題目，薛世恒選擇了前者，但他坦言其做生意手法，跟父親的看法並非一致。
採訪：梁錦雯
攝影：周樂恒
薛世恒於08年離開家族生意外闖，開投資公司，再於兩年後開了一間叫20 & Co.公司，以20年為遠景出發，最近一個項目就是下月中完工的旺角翻新商場，將會主攻零售及餐飲。對於地產新嘗試，薛世恒說：「好多人買磚頭收租，之前我哋以一個投資形式去買，去到兩、三年前，我哋想轉型做一啲發展，同買磚頭投資有啲唔同，有增值、創造件事。」
空降冇人可信
因圓爸爸薛濟傑讀書夢重返校園讀博士，薛世恒在科大讀計算機科學碩士畢業後，即被召返Neway打理家族生意，零工作經驗碰壁難免：「係老闆個仔，空降落嚟，我啱啱畢業，識得啲乜，自己知自己唔識嘢，人哋又知我唔識嘢，唔知自己做得啱定錯，只可以知道啱嘅嘢就繼續去做，但好多嘢都諗唔清楚、諗唔通，你請教人，每個人都有唔同答案，唔知信邊個。」
現開拓事業，隨心發展有興趣的生意，更由零開始開一間大概有四、五名員工的細公司，再按項目與不同的專業顧問做合作夥伴，相比以前管理一間二千人的大公司，或跟屋企打工，薛世恒直言壓力相對少：「自己做到衰晒、錯晒、執晒笠都係我自己，以前又驚做錯，屋企人畀你做，唔可以做得差，亦無可避免將家人關係同工作關係撈埋得好緊要，呢啲嘢係有衝突。」
藝術展搵快樂
薛世恒搞的Loft by 20商場位於旺角核心地段的豉油街，將會在9月中正式開業，他會於下月中先搞一個多媒體藝術展「暖場」，邀請了14位本地藝術家參加，而他的攝影作品也會參與。
主題以「1．2．3．咿！」為名，希望香港人笑多點，薛世恒說：「個社會係有啲壓抑，咁快樂本身係乜嘢呢？好多地方生活唔富足都快樂，呢個係我想搵出嚟個point。」
揸電單車減壓
攝影是薛世恒的嗜好，由讀中學時已開始，愛拍一些被忽略的人士，如早前曾到醫院見到無助的孤兒令他感觸：「冇人知佢乜嘢病，病到塊面紫色、藍色嘅眼，醫生都話唔知點解，我覺得有時感情喺心裏面，影出嚟嗰樣嘢就感動。」
另外，電單車是薛世恒近兩、三年的嗜好，愛上其速度感，更是一種另類減壓：「 平時你好多嘢諗，好多煩惱，揸電單車係唔可以諗嘢，因為諗嘢係好危險，佢逼你唔好諗咁多嘢。」採訪當日，他揸的電單車以「VIRTUS」（美德）字樣為車牌，反映出他追求一種自律、盡量去做覺得對的方向態度。
更多精采時尚內容，盡在 http://add.appledaily.com 。