「啲人成日會話：『嘩…啤梨你肥咗咁多嘅』我覺得唔掂喎。」43歲、電台DJ兼歌手葉文輝 (啤梨)講出決心減肥嘅理由。
蘋果動新聞一連兩集直擊啤梨呢次減肥過程！啤梨由6月2日第一日見肌力與體能訓練專家(NSCA)Philip Wong開始，Philip幫佢磅重度脂肪，發現150.2磅重、腰圍達35.9吋嘅嘅啤梨，體內有成33%脂肪 (註：一般成年男人，正常體內脂肪百份比大約20%，23%已經係肥胖)，咁即係話啤梨身上有成50磅肥膏咁多，而Philip仲話：「其實啤梨已經屬於癡肥嘅Level 1！」
呢句「癡肥」認真嚇怕啤梨，佢誓要搣甩「癡肥啤」稱號，問到點解搞成咁，啤梨話：「人最慘就係唔知為咩搞成咁，其實我同打工仔一樣，都係返工放工對住電腦、手機，成日坐喺度，食無定時，食飯去茶餐廳囉。」
佢話俾人話肥都5、6年，不過睇番相，佢由2007年開始肥，直至近幾年直頭腫脹，佢笑住話：「我冇唔開心，我最初以為外表點樣都冇所謂，但一玩fb live就有3成人都會話我肥咗好多，咁我為咗我嘅將來，我想大家只係講我做嘢好唔好，唔係話我又肥咗。加上今次我豁咗出去，睇我幾重、又睇我啲脂肪，我唔衰得o架，我唔想做肥啤！」
啤梨除咗會跟住Philip做運動減磅，仲有位營養師Kathy幫拖，想知佢嗰50磅肥膏減走幾多？請睇另一集動新聞！
採、編、審：懷鈺
攝錄：馮峰、Neo
場地：Bio Fitness、家營營養中心