外闖新天地，薛爸爸當然會有提點，但兩父子睇法並非一致：「佢做生意，梗係食鹽多過我食米，好有危機感，認為『生於憂患，死於逸樂』，可能喺佢眼中，覺得我好冇危機感，冇佢咁勤力未定，我撞板多過食飯，有啲嘢總係要撞出嚟，我都冇試過全盤失敗，好驚險就試過，因為知道自己白癡嘢越嚟越多，我都guarantee將來一定會仲有。」
三父子鬥發展
作為長子，會否繼續有家族生意的壓力，薛世恒就平常心去看：「我希望我做嘅嘢，有一日可能有人繼承，屋企人有需要，我一定盡我所能，我阿爸不言休，佢做緊好多家族生意，我細佬都做緊好多家族生意，我阿爸都咁講，我哋三個人、三父子一齊比賽，睇吓邊個發展得好啲，十年之後。」
以書比喻法拉
因家庭背景及與陳法拉的一段情屢成新聞人物，問到傳與胞弟薛嘉麟不和爭身家，薛世恒說：「睇得電視劇多，實際上唔係呢啲嘢。我哋差兩年，冇代溝，佢有佢嘅家庭，我有我嘅世界，唔會好似細個咁一齊生活，我哋一個屋企，係好close。老實講，冇乜機會爭同一樣嘢，各有各做。」提到法拉，問到二人是離婚、前夫或前妻關係，他淡然回應：「我會覺得向前睇啦，我𠵱家同佢都係一個好朋友，呢個係我生命入面一個重要部份，好似一本書我寫完，呢本書擺喺書架度，有時會攞嚟睇，不過我人生會有其他部份。」
