已經退休嘅「AO歌王」楊立門（Raymond，圖）最近加入廠商會做CEO，無官一身輕，加上向來同工商界啱傾，新工當然稱心如意，仲自爆有好多額外福利，例如經常收到會董送贈嘅油同米等食品，就連廁紙都收過，仲唔係薪津外嘅另類補貼？
取消強積金對沖係任內嘅火辣議題，勞福局局長羅致光已約咗廠商會下周一見面，Raymond話最好畀番勞顧會傾掂數先，唔明點解上屆政府會硬推喎。
佢之前幫手搞喺北京舉行嘅工展會，忙到一頭煙，又要開始籌備年底香港主場嘅工展會。嗱，施政新風唔只林鄭新班子獨有嘅，Raymond話都考慮加入電競比賽同VR體驗等新元素，同市民connect吓，明年仲有可能喺廣州同西安首辦工展會㖭！
至於演藝事業，當然唔會放棄，佢已籌備緊開個人演唱會，亦傾緊同一位歌星合辦演唱會，唔知屆時會唔會獻唱新特首林鄭好like嘅《同舟之情》呢？