「日日運動身體好，男女老幼做得到」，做運動梗係好事啦，好似立法會議員咁，得一支足球隊真係削咗啲，所以秘書處前排諮詢議員，問吓大家成立多支運動隊好唔好。不過結果真係得啖笑，亦相當之切合立法會議員要靠把口嘅工作特性。
6人組7人欖球隊
秘書處上個月就問議員成立多支運動隊好唔好，仲有幾種運動畀議員揀㖭，大路啲嘅有羽毛球、乒乓球、籃球、網球，亦有高爾夫球同埋7人欖球，反應最熱烈嘅估唔到係羽毛球同7人欖球，乒乓球就緊隨其後，最少人贊成嘅係高爾夫球。就咁睇，7人欖球隊或者羽毛球隊應該搞得成啦！少年你太年輕了，議員們實情同一般港男港女一樣，講就得，做就唔多肯，事關諮詢嗰陣，除咗問議員贊唔贊成，仲問埋佢哋願唔願意加入。以7人欖球隊為例，有21人支持成立，但肯入隊嘅得6個，話明唔肯加入嘅有27人。
羽毛球同樣有21人支持成立，但肯加入嘅得8個，唔肯入嘅有25個；網球仲搞笑，有8個人支持成立，肯加入嘅得1個咁大把，連打都打唔成。就係咁樣，立法會行管會決定唔成立運動隊喇。
秘書處噚日仲公佈咗另一個調查，發現有22位議員都贊成搬走放喺活動室嘅視像體育遊戲，於是秘書處應要求搬走，同埋會因應要求增設now TV及一部划艇機，原來議員真正鍾意嘅係划艇。
李八方