書展今日開鑼，次文化堂社長彭志銘嘅《粵港歇後語鈎沉》得到香港出版雙年獎嘅最佳出版獎，本來係件開心事，但佢話收到主辦單位嘅電郵後，就決定唔出席周四嘅頒獎禮。
彭志銘解釋，電郵除咗邀請佢哋出席典禮，仲羅列咗好多規矩，其中一項係要攞佢哋手提電話號碼。佢覺得有古怪，問清楚原來係特首林鄭月娥頒獎，估計因為保安問題而索取佢哋私人資料。彭志銘覺得呢種做法有秋後算賬感覺，擔心「如果佢日日搵人打畀我就煩」。
彭志銘又話，自己唔志在攞獎，只係見𠵱家出版市道咁差，諗住去撐吓場，但一聽到係林鄭頒獎，基於唔接受一個冇誠信同冇認受性嘅特首，再加上有唔合理規矩，佢就堅拒唔去啦。