洗米嫂陳慧玲(Heidi)懶理老公洗米華同日模松岡李那嘅緋聞，周不時就帶住兩個女去旅行之外，原來佢都好想發展吓自己嘅事業，好想喺商界大展拳腳，繼早前搞網上時裝、健康果汁同關餐廳外，昨日就有周刊話佢將會開埋私人健身會所，仲搵咗袁偉豪同胡定欣嘅私人健身教練梁嘉倫(Alan)坐陣㖭！
正所謂「女人當自強」，洗米嫂就深明呢個道理，昨日有報道引述洗米嫂密友話佢除咗想專心湊女之外，仲有意喺商界大展拳腳，想做女強人咁話。
報道話，洗米嫂嘅生意都好多元化吓，除咗網上時裝、健康果汁同餐廳外，最近佢就再有新動向，就係進軍健身市場，將喺中環投資過千萬開設一間健身中心，仲搵咗星級健身教練Alan坐陣，即係胡定欣、袁偉豪嘅健身教練。健身中心面積約二千呎，以黑色為主調。洗米嫂更引進一部名為「Power plate」嘅健身器材，有指呢部機器能夠刺激深層肌肉，令健身事半功倍。而呢間健身中心，採用私人會籍制，教練單對單授課，每堂學費最平八百蚊起，視乎教練嘅級數同經驗而定。
但據《蘋果》了解呢間健身中心，洗米嫂並唔係獨資，只係同朋友一齊夾份，而洗米嫂近日亦有喺ig 上載同Alan練拳情況，見佢都操到好fit，真係羡慕死人呢！