「一帶一路」係大茶飯，香港當然要響應國家策略。好似噚日金管局就舉行一場分享會，請來亞投行行長金立群大駕光臨，同差不多90位來自銀行、保險公司、資本市場嘅高層交流交流。今次亦係香港上月成為亞投行成員後，亞投行首次參與金管局主辦嘅會議，金行長咁畀面，金管局總裁陳德霖一定在場喇。
金行長會上講到，亞投行之前獲得兩間主要評級機構嘅最高信貸評級，令佢哋更有能力推進計劃，改進亞洲嘅基礎設施面貌，嚟緊會繼續優先參與目標行業項目，好期待同香港企業同合作夥伴進一步討論㖭。
金管局旗下基建融資促進辦公室（IFFO）亦咁啱成立一年，不時都會搞吓圓桌會議，睇吓投、融資兩邊點樣有機會合作。金行長之前參加高層研討會時，仲話將來亞投行發債時，一定會考慮利用香港嘅專長。