中國女排大隊噚日一早就去藥房掃貨，一班場內殺氣騰騰嘅運動員變晒少女，中國網民追捧嘅鄭益昕仲孭住卡通索袋shopping㖭。一入舖成班女排兩眼發光，係咁掃貨，本來經過半個鐘後已經開始停手，但一聽到買滿2,000蚊可以換篋，即刻再次起動，朱婷仲全程撓住隊友高意shopping。據售貨員話，鎮痛藥貼最受隊員歡迎，其次係防曬用品，有教練更使咗七千幾蚊。
之後女排轉戰電器舖，袁心玥等似乎對Switch遊戲機情有獨鍾，齊齊圍住專櫃詢問，雖然Switch已「斷貨」，但最後都訂咗六部。不過佢哋都唔係只顧自己，朱婷同高意買咗鬚刨送畀家人，孝順嘅朱婷更打畀爸爸詢問型號。血戰兩個鐘後女排「鳴金收兵」，隊員們一袋二袋大豐收，返酒店休息一陣，下晝就緊隨塞爾維亞喺大角咀作閉門操練。
