上周提及買入建行（939），被朋友恥笑等恒指28000點可以到價，幸好以6蚊買入建行計，至昨日再次高見6.48元，都有8%，以久未見作動嘅內銀而言，相當不錯。雖然未到價，但至少可以請buy side朋友high tea一餐！
本欄早於6月21日以《股災？等大媽發落》為題，提及喺大媽話事之下，港股應該會來個價值重估，追返之前被低估嘅價值。股災之前確實需要等大媽炒爆先講，剛好，上周初見內險、內銀齊升，估計國指短期將會強勢過恒指。國指上周二至今累升3.3%，確實跑贏恒指，大媽出手，連悶到喊嘅內銀都獲得重估，可喜可賀。
除咗內銀，另一個沉左半年嘅版塊亦有機會追落後，就係油股。最近油價回穩，企穩係四十幾蚊美金附近，只要油價唔再穿底，現價有成4厘息嘅中海油（883）係追落後首選。中海油上次業績受累油價大跌，產油成本下降幅度追唔上油價跌幅，全年業績大跌，上年呢個時候發埋盈警，今年睇首季業績其實唔錯，相信大媽憧憬即將公佈嘅中期業績，短線要上返9蚊、10蚊，相信無咩難度。
大媽無視旁人嘅能力奇高，自high能力絕對奇高，北水，未有咁快玩完。
Melody
http://www.facebook.com/whichroad
本欄逢周三刊出