上市公司買股票、買物業、買私人飛機見得多，估唔到有上市公司高調地宣佈，花近1億元買遊艇，講緊嘅係趙渡做主席嘅網智金控（985）。公司講明，遊艇「用於市場營銷及客戶發展」，即係用來傾生意，為小股東福祉着想咁話。
睇番資料，網智舊年蝕23億元，主要係金融資產重估虧損，唔知公司最新業績如何，總之家陣就話拎9,092萬元訂購遊艇「Benetti Mediterraneo 116'」，用來傾生意，都幾豪。
講開又講，網智金控主席雖然係趙渡，但大股東並唔係佢，大股東係……登登登凳……黃皓。網智兩年前引入新股東，家陣大股東黃皓持有13.4%，趙渡持股約10%。不過，此黃皓，不是彼黃浩！