《壹週刊》首創「狗仔隊」文化，95年直擊沙巴，踢爆當年梅豔芳及趙文卓的戀情最為震撼。據悉，《壹週刊》創刊不久，娛樂版成立一支隊伍，稱之為特別調查組，特別調查組皆非娛樂記者出身，其中一名曾是一位明星的司機，因此對明星出沒地點較易掌握。
最初，他們是收到線報才會出動，一名文字記者配一名娛樂攝影，工作模式跟香港警察內部專門負責跟蹤調查案件的一個隊伍類似，該隊伍在警隊早年俗稱「小狗隊」，因此特別調查組自然被叫作「狗仔隊」。
除狗仔隊外，《壹週刊》叫人印象深刻，不得不提搶眼的標題。
曾任《壹》仔高層的葉一堅年初接受《壹週刊》訪問時坦言，雜誌封面決定了每期的銷量，如何搞好一個封面是最重要課題。「嗰時做一個封面係不惜工本，因為個封面係點，就決定你個期賣唔賣得，我哋好認真去做一個封面，例如當時北姑雞剛來香港，好多人討論，我哋做咗個酒店雞竇專題去揭露現象，為呢個封面就要租間酒店房去影相。」
到了封面起題時，所有人更是花費大量時間討論，而此時肥佬黎往往是天馬行空，江湖和街頭術語盡出，目的就是要直接和傳神，讓讀者一看就有興趣。「例如呢條題呢，係所有人坐哂喺度諗哦，譬如呢個雞竇殺入四五星酒店，我印象中呢條題就係肥佬黎起，肥佬黎起題無章法，冇文法，我哋讀新聞系出來，覺得唔通哦大佬，雞竇係名詞，點樣殺入酒店呢？所以大家又討論，最後結論都係雞竇殺入得哦，雞竇感覺多人呀嘛，結果個期又真係賣得。」
「有期封面係偷食二奶村，好多人討論，咩叫偷食二奶村，邊個去偷食先？二奶村係名詞，識去偷食咩？但呢個題目又係賣得哦，之後我哋終於明，原來唔識那些人唔明更想睇，佢睇就賣得啦。」原來留部份想象空間給讀者，題目不把事情說得太盡，這樣更使人有衝動賣來看看到底是甚麼一回事。