香港電腦通訊節8月25日開鑼，一連4日喺灣仔會展舉行。除咗人氣急升嘅電競比賽，今年大會仲加入咗好多新項目，好似「電腦節Cosplay大賽」就係其中一樣喇，參加者要cosplay電玩角色，決賽當日獲得「最多like」嘅3位得獎者可以得到獎金，冠軍嘅獎金仲高達兩萬蚊。
除此之外，大會仲會選出KOL環保之星，優勝者可以獲得網媒主持人合約，仲可以參與社區、校園巡禮，宣揚電子回收同環保訊息添！
電競熱潮越燒越旺，今年自然亦成電腦節焦點，大會話會有更多豐富嘅賽事，聽講規模亦都upgrade咗唔少，仲首次加入手機平台賽事，到時一定會吸引大量海外知名嘅選手參賽。市民亦有機會同網絡紅人喺現場試玩最新電競裝備以及未推出嘅遊戲。