百麗（1880）私有化方案，噚日獲股東大比數通過，不過現場有唔少小股東就諸多不滿。有位鍾意百麗10年嘅張先生就特別激動，開會前已經話對管理層好失望，覺得「被賣豬仔」，會議結束後，仲主動行入記者室，坐埋首席執行官盛百椒個位，發表偉論！
由於噚日由開會到點票足足花成4個幾鐘，當記者們呆呆地喺記者室等候之際，竟然有位小股東張先生，主動行入記者室，仲同傳媒講，剛才同管理層反映咗唔少意見。後來佢越講越激動，行前坐低喺原先安排畀盛百椒坐嘅位置，拎埋貓紙出嚟講佢對百麗有乜不滿。
張先生足足講咗3分鐘，仲話自己雖然揸得一手，但就算去到當年17蚊高峯時都冇沽，真係夠晒長情。