林鄭月娥上任特首後銳意帶起施政新風，喺好多問題上一改前朝作風，好似施政報告嘅發表日期就由梁振英上任時由10月改到1月，復辟至煲呔年代嘅10月，佢登場後嘅處女作出爐有期，立法會最新日誌顯示特首會喺10月11日、即立會暑假復會後到立法會發表施政報告。
雖則距離10月至今仲有3個月，但建制派好猴擒，急不及待要就林鄭處女作插入建議，經民聯立法會議員噚日已經拉隊同林鄭見面，提交達225項嘅期望，黨主席盧偉國都巴之閉咁話佢哋係首個向林鄭反映報告建議嘅政團喎。咁林鄭反應如何，係咪好享受佢哋咁主動？盧偉國話林鄭對佢哋嘅建議反應正面。民建聯亦喺噚日見咗林鄭。而財爺陳茂波過渡至新班子後首份財政預算案則喺明年2月28日面世。