江若琳（Elanne）同男友「生煎包王子」蕭潤邦（Oscar）打得火熱，唔單止愛情得意，就連事業都一帆風順，回歸香港樂壇接連獲前輩出手相助，繼主打歌《小燈塔》請到偶像周慧敏為劇場版錄旁白，新歌《思念做宵夜》MV就搵到老友鬼鬼嘅杜汶澤執導，認真夠晒面子。
兩人曾合作拍電影《高舉．愛》，江若琳表示：「呢首係比較哀傷嘅失戀歌，未完成錄音已經諗起杜生，希望係《高舉．愛》嘅延續，以一個妻子思念死去嘅丈夫為故事大綱。」早前江若琳為奇妙電視節目《杜汶澤食住上》做嘉賓，即刻反客為主邀請阿澤：「我同佢講『做我MV男主角好唔好？』佢立即話好吖，我跟住問佢做埋導演好唔好？佢又話好吖，我仲以為佢講笑，點知佢馬上叫助手安排時間開會，相當有義氣。」
日曬雨淋
阿澤很認真執導MV，足足拍咗兩日，江若琳話：「日曬雨淋都經歷晒，第一日好熱，氣溫有35度，第二日就落黃雨，真係難為咗導演。」據知江若琳有場淋浴戲，孤獨痛哭表現專業，導演問佢使唔使休息，佢都話唔需要。
撰文：馮仁昭