前排傳出新世界發展（017）前聯席總經理陳觀展過檔去內房股龍光（3380），噚日龍光終於正式公佈委任陳觀展做執董，仲做埋龍光地產國際投資嘅總裁㖭，負責海外項目投資與營運。
今次通告除咗披露陳觀展嘅猛料覆歷，仲披露咗佢將以年薪150萬元加盟，另按年度目標業績釐定酌情花紅。
睇番新世界2016年年報，當時仲做緊聯席總經理、執董嘅陳觀展總年薪710萬。咁大家驟眼睇，可能覺得陳觀展過檔龍光嘅150萬年薪唔多高。
不過有睇開內房股高管人工，大家都知其實好戲在後頭，往後花紅同購股權兩者兼收，應該幾和味。
事關近兩年內房股合約銷售升得好勁，除咗好捨得派花紅外，好多公司為激勵員工，都有採納購股權計劃，獎勵高層。雖然未知陳觀展會唔會受惠，但相信都十不離八九喇。