書展就快開鑼，唔少新書出爐。專寫人物訪問嘅《蘋果》特約記者冼麗婷亦將26篇喺〈品味蘋果〉刊登嘅長篇文章，結集成書《見字如見人》，每篇附後話記載採訪經歷同心情。
阿冼筆下唔少受訪者都係重量級，遠赴英國搵肥彭、到台灣會蔡英文，亦曾到波斯尼亞採訪戰火下人民，細膩筆觸感動眾人。新書嘅序亦星光熠熠，有徐立之、林煥光、李怡同新世界發展副主席及總經理鄭志剛等，其中鄭志剛話透過阿冼嘅眼光同筆觸，所有人與事都變得不一樣。曾任中大校長嘅著名學者金耀基更為新書題字兼撰寫推薦語。
結集特別刊登阿冼小六嘅作品〈我的父親〉，佢話細個已經鍾意作文，小六時將此作品投稿至《香港時報》並獲刊登，「所以我早喺小六已有稿見報，仲有少少稿費㗎！」著名漫畫家草日為此作品創作可愛插圖。阿冼仲喺結尾向多名《蘋果》高層致謝，多謝歷年指導兼包容。