智利球星阿歷斯山齊士出年就約滿阿仙奴，雙方一直未續約，雖然領隊雲格話會留「山神」，但山神就似乎想離隊喎。阿仙奴家陣喺澳洲季前集訓，但山神因為早前幫智利踢洲際國家盃，所以繼續喺智利放假。28歲嘅山神接受智利電台《Radio Sport Chile》訪問時坦言︰「我想踢歐聯，決定權唔喺我度，我需要等候阿仙奴嘅決定。我已經做咗決定，要等阿仙奴嘅答覆，我想踢歐聯同埋贏歐聯冠軍，呢個係我從小以來嘅夢想。」兵工廠上季得英超第五，下季冇歐聯踢，只可以踢歐霸盃。
據報，曼城同埋拜仁慕尼黑都對山神有興趣，兵工廠當然希望可以將山神賣去國外啦，但山神就似乎想留喺英超搵銀。講開曼城，佢哋近排積極簽人，日前簽成咗基爾獲加，又有傳佢哋想同利物浦爭簽RB萊比錫中場拿比基達。