由原來失落副財政司長，到出任發展局長，再到喺曾俊華辭職選特首後坐正做財爺，繼而過渡冧莊做多一屆，陳茂波嘅財爺路，真係𥧌迴路轉，估你唔到。佢喺網誌撰文提及讀書奮鬥史，自稱係「丙組隊」，努力作賽下「爆冷」，唔知係咪意有所指？
陳茂波中學就讀於天主教培聖中學，佢話當時培聖中學仲未搬入天水圍，位處九龍塘牛津道，佢同唔少同學出身基層家庭，入學成績一般，但自知不足反而更努力，仲贏埋校際常識問答比賽冠軍。
考大學嗰年因為屋企地方狹窄，圖書館又難搵位，佢同幾位同學成日約埋夜晚偷偷地返學校溫書，後來索性喺學校過夜，最後佢嗰屆計埋佢有廿幾人考入中大，亦有唔少同學到海外繼續升學，自稱：「頗有點『丙組隊』努力作賽，最終『爆冷』踢出好成績的味道。」