舊年煞科日，葉楚航馬房只贏「隨心隨意」（已退役）。一年內的今天（16日）佢來個double，先於第四場用韋達勝出熱門「盛勢」，繼而第六場四班1400米，用女將蔣嘉琦爆冷贏「慷慨寶」，成為上半場唯一起孖練馬師。六歲馬「慷慨寶」今場一放到底，單Win及組合獨贏A3分別派173及29元。
「慷慨寶」對上一次贏馬已是2015年1月尾由潘頓勝出谷草1200米，本身近三仗均在潘頓胯下敗走該項途程，呢次轉往田草加程跑1400米，騎師換上蔣嘉琦，人馬合作於第2檔起步沿欄順放，臨尾勁勢不減，就此帶返終點，彈甩對手1.75馬位，爆出17倍冷Win，「慷慨寶」足足相隔兩年半始再捷。
24歲女見習騎師蔣嘉琦，早前手風欠順兼策「上利多」未盡全力，停賽一段長時間，今次「慷慨寶」之勝，是她自5月13日「美麗皇者」後，個人兩個月以來首場頭馬，兼為個人衛冕最受歡迎騎師失敗補數。
整日跑11場賽事，第六場係三T次關，二至四名分別由「好友益」、「勝利專家」及「自動波」拎到，四重彩冷頭熱腳，每注派彩一萬八千幾。