周汶錡（Kathy）同法籍老公Julien生咗兩個得意囝囝─「小情人1、2號」、分別係大仔Jacques同細仔Avner。兩兄弟越大越似足餅印，同樣有深輪廓同大眼睛，真係得意到爆燈。
昨日Kathy喺IG貼囝囝新相，啱啱過咗三個月大嘅Avner，同哥哥Jacques、爸爸齊齊喺家中個浴缸浸水。肥頸仔箍住個水泡嘅Avner，手手腳腳十足米芝蓮咁，頭頂執鬈毛勁搞笑，人仔細細唔怕水仲識望鏡頭笑，睇嚟不久將來，網民又多一個送like目標。
至於醒目媽咪就喺相中，幫大仔Jacques重要部位，貼咗隻八爪魚貼紙，費事俾人睇蝕晒嘛。