「你有freestyle嗎？」
相信大家呢兩個禮拜喺網絡上、真實上都聽過唔少次。冇錯嚟自大陸hip hop真人騷《中國有嘻哈》入面嘅評審之一，喺韓國發展過嘅吳亦凡，海選揀卒不斷問人「有freestyle嗎？」喺大陸同台灣仲有唔少人二次創作o添！不過就有人維護話其實呢句對白係製作人畀佢，等節目多啲gimmick。
《中國有嘻哈》呢個節目都真係夠晒噱頭，除咗吳亦凡之外，仲搵嚟蒙面參賽者Hip-Hop Man玩神秘，有睇節目就知齋聽把靚聲同「神級」嘅普通話就知佢係MC Jin，佢每次出場大家化灰都認得佢，除咗一眾嘅參賽者之外，就連幾位評審吳亦凡、潘瑋柏、張震嶽、MC Hotdog都好似非常respect佢咁，無他嘅，是關MC Jin真係喺hip hop發源地美國出身o架嘛！
而喺最近嗰集，Hip Hop Man（MC Jin)就同雙胞胎組合OBi & MO3 battle（其實係合作一齊唱首歌，再由評審揀邊個唱得好啲），佢哋表演《兄弟們的歌》又真係幾好聽，而MC Jin用中、英夾雜咁唱，當然佢普通話嘅準確度就梗係差少少。不過唔知係咪節目需要啦！雖然明顯MC Jin係超晒班，不過評審們就偏偏針住中文個point，其中潘瑋柏就話：「其實我希望多看到中文。」之後MC Hotdog就話：「其實Hip Hop Man我覺得英文真係稍嫌多了一些，因為《中國有嘻哈》再怎麼說也是第一屆嘛，我真的希望我們第一屆出來的優勝選手，他還是真的必須是不管是普通話也好、方言也好，你知道就要，他不應該是英文那麼多的一個優勝選手。」而最後節目剪輯就係Hip Hop Man喺台上話：「好了，我走了，ok！byebye，美國見！」
節目出街之後，MC Hotdog同潘瑋柏即時變晒衰人咁樣，仲有唔少網民喺佢哋fb留言，戥MC Jin唔抵，仲話hip hop係美國文化點解唔可以講英文咁話！
MC Hotdog身為rapper畀人鬧爆又點可以唔「還拖」呢，仲開post話：「我讓你們罵，我理解，也沒什麼好說的，誰不想當好人。那些罵我的最好在下禮拜新1集播出之後每個人都過來跟我道歉，不然我們就.....美國見。放輕鬆點嘛大家 祝大家週末愉快！」似乎暗示MC Jin唔係真係被淘汰咁噃！
不過其實點都好，MC Hotdog嘅留言中有一句真係講得好好：「原來這個節目真的這麼多人在看！而且大家入戲都好深，嚇死忘詞王本人我了！」其實大部分綜藝節目都係圍繞住劇本嚟做（尤其係大陸，好似係），就算評審都只係高超少少嘅演員之嘛！