林鄭班子嘅行會新「智者」，包括安老事務委員會主席林正財，林正財接受港台節目訪問時透露，林鄭約係喺兩個月前邀請佢加入行會，自言擔任公職近20年，習慣與不同人士接觸，都算半個政治人；由於加入行會至今得嗰兩星期，唔覺得工作特別忙或者好大壓力。
有意見指行會成員平均年齡比較高，未必回應到年輕人嘅訴求。林正財話最重要係多認識年輕朋友，從中學習，等自己心境更年輕，政策更貼地。
問及佢喺林鄭出席立法會答問大會時，被傳媒影到猛咁低頭睇電話，佢自己解畫話，好鍾意一心二用，強調有留心聽問答㗎，之後仲傳訊息畀林鄭讚佢「開頭都開得不錯」。外界對副局長人選好多意見，佢就希望社會畀多啲自由度林鄭揀選團隊，唔好因為政治背景而下定論。