話咁快就來到馬季最後一日，天公似乎唔多造美，今日（16日）煞科日有時大雨到直頭望唔清楚對面直路。
唔少馬迷特意前來睇煞科戰，獻出自己的第一次，讀獸醫嘅梁小姐就係其中之一，佢話馬場氣氛幾好，仲覺得賽事好刺激。唔知讀過獸醫嘅佢，會唔會有特別揀馬技巧呢？
梁小姐說：「基本上我睇馬，會睇佢哋跑起嚟會點，睇吓佢跑得快唔快，或多少都同我嘅專業有關。其實自己都不太識佢哋以往嘅賽績，最後覺得邊匹得意，就買佢囉！」唔怕啦，入多幾次馬場，交多幾次學費，應該好快就會變專家。
馬迷入場，少不免想有斬獲，例如馬迷區生咁，佢就想喺煞科日贏好多，佢朋友昌哥都有相同諗法。昌哥說：「呢樣嘢（賭馬）俾我贏幾多，咪贏幾多囉！」
提提大家，雖然今個馬季就已經完晒，不過仲有一夜致富機會，就係周二（18日）有成8,000萬暑期金多寶彩金嘅六合彩，想發達嘅馬迷萬勿錯過！