古天樂與衛詩雅主演的電影《喵星人》前晚分別在銅鑼灣及旺角舉行首映，由於趕時間，古仔在銅鑼灣只出場一分鐘影相，即要閃人，而戲中另一主角喵星人犀犀利就幫手撐場，大受歡迎，不過現場由於人多又焗，有傳犀犀利差點暈倒。
親熱戲破紀錄
其後，古仔轉到旺角的仁愛堂慈善場首映，身為該會副主席的周焯華太太陳慧玲（洗米嫂）亦有出席，但透過公關表示不做訪問。古仔與馬麗接受訪問時，問到犀犀利在銅鑼灣首映，因太焗差點暈倒，古仔表示：「佢係默劇演員，每次都擔心佢中暑，之前喺數碼港個露天廣場拍，好長時間要跑5、6分鐘，嗰次好驚佢中暑。」
問到與古仔有親熱戲開心嗎？馬麗笑言：「我還好。」在旁的古仔即以普通話說：「我很開心。」之後再轉用廣東話表示：「其實初時係冇，第一日導演就加，每次馬麗發脾氣，我錫佢𠱁番佢，所以超過20次，場場錫，破咗我紀錄。」
衛詩雅拒收兵
至於衛詩雅在戲中飾演古仔女兒的體育老師，視飾演足球守門名將的古仔為偶像，對他非常瘋狂。衛詩雅自言現實中的自己較為被動：「遇到唔敢出聲望住對方，愛一個人最盡係畀提示佢，覺得自己好冇用，好失敗，自己慢熱，亦冇興趣想收兵同覆對方，因為唔想嘥時間。」衛詩雅更透露戲中與小朋友拍戲大受歡迎，更買糖湊他們，她說：「點知古仔一嚟到就圍住佢，我都唔明白，我都nice，所以好傷心。」
採訪：黃曉妍、卓寶花
攝影：仇志德