本來我想寫：《2017至Short Cookbook》，或者《2017至嗦Cookbook》嘅；無奈巿場慣睇中文標題，拒絕英文囉，從善如流回頭是岸。
不論Edward定係葉子騫都未免太乖，相對本新書個名，80後肥仔阿爸改嘅出世紙名真係唔夠癲：《十九窮風流廢青日常食譜》。
匆匆未睇完，評語：開卷即笑！
期待良久，自己曾經都想寫一本比較新思維，都唔好講食譜，不理食書定食贏，就一本跟食有關係，讀來讓你覺得自己存活喺新時代、食在家陣嘅書，縱使食嘅係垃圾、Junk！
眼高手低？就唔好講自己咯。
推薦叻煮後生朋友給出版社，私下提議以80、90後生態落筆，與現實貼地，放棄淨係賣阿婆教落嗰套。（傳統老經驗當然如珠如寶不過只能寫一、兩本用作騷Quali，這方面對手云云，50後、60後、70甚至80後靚佬靚婆廚師兼煮得勁者無數，編輯幫手執執字，出版社攝影師設計師操刀，本書要幾架勢有幾架勢，對手云云，何用添多一個半個同類型作者？走傳統路線一山還有一山高，睇落有型，煮得更堅！）
點止80、90後廢青？蘋果、薯片、洋葱Pizza、串燒腸仔、珠江橋牌午餐肉、合味道杯麵、豆豉鯪魚、Coca Cola、出前一丁……早喺我嗰代嗰陣已經非精神、而是如假包換腸肚食糧。
阿仔，公仔麵冇益㗎，膠嚟㗎！要食就淨係食個麵好啦，味精湯千祈唔好飲啊、啊、啊……
得啦阿媽……唔飲味精湯，不如放棄即食麵？
咕嚕二話不說，飲咗至算。
葉子騫呢本新書，唔敢話佢教，當佢同大家分享丁麵、杯麵改變基因；主要係煮者、食者的認知與接受基因：丁麵三文治，杯麵壽司，公仔麵雪糕……（明續）