練馬師告達理近日展示無比鬥志，對上兩次賽事出五駒豪奪一冠兩亞一季，今午（16日）馬季煞科第一場五班1200米草地告達理又贏「快樂火龍」，佢同巴林冠軍騎師沈拿合作由谷草贏到田草，「快樂火龍」打開服役勝利之門，單Win及組合獨贏A2分別派71.5及30.5元。
人稱大告的告達理今季點都畢唔到業，事關佢贏埋「快樂火龍」，頭馬仍只得8場，距續牌指標16Win仲差一半。不過佢冇自暴自棄不得止，反而搏得一場得一場，繼剛周三（12日）晚由沈拿爆冷贏「勝利寶石」後，今場又用這位馬迷陌生的客串騎師勝出「快樂火龍」，騎練累積兩次合作贏晒，堪稱今季煞科前最大發現。
「快樂火龍」沿途守中前位置，直路突圍後力拒「飛壹般」衝刺，險勝短馬頭位。沈拿一連兩日分別首勝谷草及田草，在香港馬圈留下好印象，來季隨時再獲發牌前來客串。至於4歲之「快樂火龍」第12次出賽開齋，馬主封俊賢養馬以來首度拉頭馬，可謂煞科前最大禮物。
頭場賽果好冷，二至四名分別為「飛壹般」、「福之寶」及「盈進」，四重彩派39萬幾。