四個民主派議員被DQ，霎時又令特首林鄭月娥想搞好嘅行政立法關係現變數，但有官場中人對此唔太憂心，私下評估認為今次DQ結果引起嘅公眾反響唔算好大，適逢立法會暑假休會，亦或令大家有個冷靜期，花生友相信林鄭以至民主派，都要為點拆彈傷腦筋，但要數呢次大贏家，建制派話肯定係前特首梁振英，預料阿爺日後對佢疼愛有加。
其實呢次DQ四個議員嘅最大影響，係民主派喺議會全面失守，地區議席唔夠一半嘅情況，唔只會喺呢段空窗期出現，皆因建制派估計（或者施壓都未定……）他日若有補選，九西同新東極有機會兩席一齊選，換言之建制有望額外多兩席，民主派喺地區直選依舊唔過半，所以有建制派話冇諗住趁少咗四個民主派嘅時候修改議事規則，一啲都唔奇。因為部份人坐定粒六，等補選有結果後先出手都未遲，名正言順喺地區及功能組別通殺，何須喺呢個時候爭一日之長短，亦無謂為林鄭班子挑起火頭！
建制讚「夠勇武」
可以出現建制派喺立會「暢通無阻」嘅局面，有建制話始作俑者梁振英應記一功，皆因佢破天荒以梁班子名義入稟，有建制中人話愛國陣營連日「喜氣洋洋」，唔少人歸功於梁振英「夠勇武」，緊跟阿爺硬打港獨同自決嘅旗幟，換轉第二個做特首未必敢做，梁嘅舉動對中央嚟講肯定立大功，相信會畀689喺政協副主席一職上發揮更大「影響力」。
點解阿爺咁信佢，又要DQ佢？咁阿爺都係現實派嚟嘅，如果689再爭連任，建制派肯定喺其後所有選舉全面失守，到時就係真正大鑊了。要勁草定議席？唔使諗嘞啩！
花生友