張繼聰、鄭欣宜、蔡瀚億（BabyJohn）、陳詩慧日前喺灣仔為新片《西謊極落：太爆．太子．太空艙》宣傳，戲中其中一個賣點係張繼聰好愛欣宜，因為住喺蝸居嘅問題，想同女友開心一晚，四出去搵主題情侶賓館，甚至將自己架貨車改裝做炮房。
喺戲中成日拎住性玩具嘅阿聰，要喺欣宜面前揮舞，佢哋都話第一次接觸性玩具，學到唔少嘢，欣宜坦言覺尷尬。問佢哋有冇借啲玩具返去試吓？阿聰笑話：「偷道具好大罪，今次叫做見識過。」講到肉搏場面，欣宜話忍笑最辛苦，阿聰解釋：「我加咗啲獸性，錫錫吓逼佢叫我三角挫、鑽地鼠，唔似人哋親暱叫BB。」欣宜先後同阿聰、BabyJohn咀嘴，問佢邊個好錫？欣宜得戚話：「兩個情況都唔同，大家自己睇。」
林敏驄爆肚
BabyJohn同林敏驄有對手戲，佢話事前點睇劇本都冇用，因為林敏驄埋位講對白又唔一樣，雖然自己都接得住，不過忍笑就好辛苦，好多時索性唔忍笑。至於一人分飾多角嘅陳詩慧，演情侶賓館性感接待員，有場戲受盡皮肉之苦，佢話：「講冇晒房，阿聰一嬲之下，拎起支蠟燭向住我吹熄，點知意外將啲蠟吹咗落我心口。」
撰文：馮仁昭