美國時間上周六晚，身價7,500萬鎊（約7.7億港元）嘅盧卡古第一次代表曼聯上陣，友賽洛杉磯銀河。呢位比利時中鋒下半場入替，踢咗45分鐘，表現麻麻地，冇入到波，反而拉舒福特就最搶鏡，梅開二度，幫紅魔以5:2擊敗銀河。賽後領隊摩連奴話收貨；至於今夏離隊嘅前隊長朗尼就以前輩嘅身份，提醒盧卡古要有好嘅心理質素先踢得掂曼聯，仲若有所指話曼聯冇啲有份量嘅老大哥帶住，係難踢啲。
福仔入兩粒最省鏡
呢場係曼聯今夏第一場比賽，上半場冇派新兵落場，但靠「福仔」一個已經殺晒！可能知道盧卡古坐喺後備席，福仔點可以唔落力，呢位英格蘭前鋒先喺兩分鐘開紀錄，之後20分鐘射入第二球，幫紅魔領先2:0。加埋費蘭尼喺26分鐘建功，曼聯拎住3:0優勢返更衣室。換邊後，曼聯換晒11個人，盧卡古同埋域陀連迪路夫兩個新兵粉墨登場，盧卡古拍住安東尼馬迪爾攻堅，至於連迪路夫就同艾歷拜利同埋杜安施比踢三中堅。下半場初段，盧卡古有個好機會，但佢單刀一射被門將撲出。之後就輪到佢嘅拍檔搶鏡，馬迪爾助攻米希達利恩射成4:0，之後呢位法國前鋒射成5:0。雖然銀河末段由杜斯山度士入番兩粒，但曼聯仍贏5:2，喺季前賽打開勝利之門。
雖然盧卡古表現唔算好，但賽後摩佬話：「盧卡古唔同朗尼，朗尼唔單止係前鋒，而盧卡古就更似一座前場橋頭堡。佢速度好快，表現出係個注重團隊嘅球員，我好滿意。佢在意嘅唔係自己踢成點，而係成隊波嘅表現。」至於今夏離開曼聯、重返愛華頓嘅朗尼就話：「曼聯係英國以至世界最大球會之一，你要有強大嘅心理承受壓力先可以喺度立足，如果有咩缺點，將會毫無保留俾全世界知。」朗尼仲話當年佢加盟曼聯，仲好在有費格遜睇住，又有傑斯、史高斯等老大哥照顧，所以適應得好快，但曼聯家陣就欠缺呢啲老大哥人物，所以盧卡古會較難適應。
另外，對於皇家馬德里球星基斯坦奴朗拿度（C朗）回歸曼聯呢個問題，摩佬就話冇可能成事︰「C朗喺佢間球會係咁重要嘅球員，有好大經濟效益，搵唔到任何C朗可以離開嘅理由。」