有志者事竟成！鄭俊偉這天（16日）於沙田馬場作出最佳演繹，他頭兩場「福之寶」及「智有心得」跑第三及第二後，呢位華人練馬師在第三場四班草地1200米再進一級，靠見習騎師潘明輝勝出「仁仁友福」，取得馬房寶貴的第16Win，個人馬季結束前達標，唔使收馬會警告信。「仁仁友福」單Win及組合獨贏A1分別派34及14元。
鄭俊偉近日逢出必拼展現無窮鬥志，今日出九駒，一開場佢已有「福之寶」在賴維銘胯下跑第三，第二場「智有心得」夥拍沈拿影相輸短馬頭位做二奶，非常唔夠運，卒之第三場皇天不負有心人，佢以「仁仁友福」贏夠16場頭馬畢業。
「火車潘」潘明輝這天亦顯得充滿鬥志，停賽復出首策「仁仁友福」，佢將呢匹匆出馬發揮得恰到好處，沿途守五六位，末段從外叠一攻而破，大勝兩馬位，「仁仁友福」苦戰九個月，亦告敲響今季勝鼓。
第三場二至四名分別為「幻影飛鷹」、「常豐裕」及「銀城福星」，四重彩派5,477元。其中「幻影飛鷹」騎師楊明綸頭三場得一冠兩亞，煞科日表現好醒神。