街頭歌手劉卓軒前年9月在觀塘港鐵站出口自彈自唱《高山低谷》時，被港鐵職員驅趕，當時他向該職員解釋，根據地契資料顯示，該位置不屬港鐵範圍，所以不算佔用港鐵地方，圍觀途人拍掌叫好，片段被放上網後令劉卓軒一夜成名。
下月便26歲的劉卓軒，最近和20歲女鼓手Fing、結他手KK、彈Bass的Rocky合組樂隊「未能接通」，並將推出專輯。劉卓軒日前接受訪問，透露組樂隊是緣份，他說：「阿Fing係我喺街頭唱歌時識，佢買咗支水畀我飲，後來問番佢，佢話見到我玩音樂幾好喎！又幾靚仔，嗰個形容詞真係佢講㗎！」至於樂隊名由來，劉卓軒直言和隊員經常聯絡不上：「試過有次約阿Fing，遲到咗兩個鐘。」
推廣粵語歌
所以未能接通有首新歌叫《暫時未能接通》，不過劉卓軒指此歌其實是希望有更多人關注廣東歌，他說：「好似睇韓劇《來自星星的你》，成日聽到『You are my destiny……』跟住係唱韓文，我本身唔識韓文，好奇之下去查吓個韓文點解，今次首歌會出現兩文三語，希望有啲唔識廣東話嘅樂迷聽到，都會好似我咁，去了解吓歌詞。」
採訪：小米
