【本報訊】訪問後沒兩天，彭凱恩就私訊記者告解：我又得罪人了。大埔生活書院搞市集，有人派免費樽裝水，她即時發難：檢視人與自然共生關係的活動，何解自相矛盾派膠？這個總愛戳破國王新衣的揚眉女子，是「撲水」創辦人，新近自資開發手機App2.0，向港人推介全港飲水地圖，只為勸勉世人：不要買樽裝水。
記者：呂麗嬋
她在報章有個專欄，又與丈夫開設名為GoGreenHK的中英文網站，自認「得罪人多」的彭凱恩，不時在自己園地開名發炮，尤其針對那些掛環保綠色羊頭，但一枱贊助膠水樽的國際會議。今年4月，她因為看到一個國際氣候變化會議場內滿桌即棄餐具，即時越洋電郵發炮。理大舉辦環保經濟會議，一枱藍色蓋膠樽水，一樣無面畀。
不平則鳴，環保女俠寶號不脛而走。她自嘲「叫得俠，通常獨行，即係唔使點食飯」！好在與務農的丈夫，生活樸素，樓無供仔無生；她3年無坐過飛機，只去過福建單車遊。「以前做律師，只有兩套suit輪流着」。2000年港大法律系畢業，女人四十，人生下半場她決定做回自己。
「環保係生死問題」
小倆口的農場位於上水，面積逾3萬平方呎，滿眼當造茄子粟米，還有各式香草。家住粉嶺聯和墟，試過踩單車返農場，炎夏高溫，就轉兩程小巴。
「以前住馬灣，一放假就同佢去執垃圾，上網睇片再恐怖，都比唔上你手執一堆膠樽同膠蓋咁震撼」。最埋身一役，要數十年前在北京工作的兩年。「環保唔係食飽冇嘢做，係生死問題，細個冇哮喘，喺北京，晚晚喘到瞓唔到，照肺睇醫生唔知咩事，好驚，直至買咗兩部空氣清新機，夜晚先瞓到」。
2008年回港，像一般專業人士，吃有機菜、做足垃圾分類，定期捐錢給環保組織，放假去環團做義工。「第一次出席活動，係喺商場幫人貼印水紙」，越積極參與她越迷惘。「香港嘅環團模式係我做嘢你拍掌捐錢，大環團叫你幫手貼印水紙，細環團定期開會吹吓水，吹完散會」。
說真話難免得罪人多，要付代價。「人哋覺得你明落佢面，有嘢自然唔會預你」。就如政府只講回收，但一定不會叫人別飲樽裝水，畢竟社會和諧官商民合作，仍是香港至少是政府希望達致的主旋律。「環保界都有樽頸，人人提solution（解決方案），但冇人敢做壓力團體，怕得罪人」。她舉例指近年全民馬拉松，幾近每個周六、日都有大小跑步比賽，財雄勢大的樽裝水供應商，往往是最大贊助商。
出租水機減廢
「有贊助，唔通唔要？呢個係現實問題」。不少環團依附大財團及政府而生，那敢造次？只是世事何曾絕對，去年在西九文化區舉辦的「一點粉紅」（Pink Dot）活動，終「突破盲腸」。「個活動獲好多飲品品牌贊助，籌辦期間有個有心人提醒佢哋唔好派支裝水，輾轉問我會唔會有飲水機出租」。
她見機不可失，臨時臨急搵「善長」（其實是朋友）贊助飲水機，拋磚引玉下，水機公司又另外捐了5部水機給她。「行出咗一步，好多嘢係可以改變嘅」。收起團火，俠女笑得好甜。炎炎夏日，你今日又帶咗水樽未？