真正的牛三會令大眾恐慌入市，雞犬齊升，但未到牛三之前的牛二實在是耐性和策略的考驗。大時代之前的長時間牛二中，最理想的上策當然是以逸待勞，買入不斷破頂的強勢股，然後齋坐等食升幅，既唔使煩，又無壓力。
但如果面對強勢股不斷破頂而又唔敢追貨，或者之前因手痕而忍唔住手食左，𠵱家又唔敢買番，貿然將資金掃入過於落後的股份只能算是下策，因為見着一隻又一隻股份破頂，而落後股又唔知幾時會升，隨時有排坐而令自己失去耐性，一個唔覺意在炒到落後股前又耐不住其他股份誘惑沽出，最後只會脫離市場升幅節奏，兩頭唔到岸。
上策難行，下策雞肋，唯有將心思轉向中策—趁火打劫。破頂唔敢追，沉底唔會買，所以選股方法成為決勝關鍵，中策之計是趁市場炒得火紅火綠，由形態着手，留意一些最近股價接近6個月高位而又未破的股份，買入強勢中的次等股，趁火打劫搏該股市旺能突破6個月的阻力，一旦破頂成功隨時到達另一片天空。
趁火打劫形態的特徵是股價近6個月在波幅區間中走動，沒有明顯趨勢，而且途中曾有一至兩次突然下跌，甚至跌穿上升軌，但之後修復升軌，形成了一個大型的波幅區間，而在近期是接近6個月的頂部。
最近有此形態的股份破頂之後都有不俗的升幅，例如2136，在破頂當日上升了兩成有多。而縱觀市場上仍有為數不少這種形態的股份，較大型的有914，由2月至5月間一直在高位徘徊，但未能儲力破頂，到5月初更跌穿上升軌，形成恐慌之勢，但5月、6月在跌穿升軌後應跌不跌，更經歷了兩個多月在$26邊的整固，一踏入7月便重新攻頂，重上4月時$28的高位。這反映股價在4、5月上升後面對獲利回吐壓力，於是到達5月便有一波沽壓，當時市場仍在十五十六，考慮接受上升後的股價與否，但兩個多月間股價沒有下跌，反映市場不停消化前一升浪中獲利回吐的壓力，於是供應減少，而股價重新攻頂則反映市場已接受$28的價格，於是重現需求，在水漲船高、一部份股份先升起來後，股市資金充裕，有機會資金慢慢湧入這類快將破頂的股份，相信很快會走入破頂直路。
灝昇
https://www.facebook.com/speculatorjunior