劉卓軒前年以測量師身份K.O.地鐵職員，贏到歡呼聲，之後專心玩音樂，組成樂隊「未能接通」。劉卓軒一夜成名，除咗敢言，仲因為個專業資格，普通人聽到都會覺得震憾。但講到名銜呢啲嘢，又唔係佢獨有喎：
許廷鏗
年初喺大台《勁歌》贏到最佳演繹男歌手同勁歌金曲獎，又有特別優待長達6分鐘表演時間，最後都係選擇離開大台過檔華納。如果佢做唔成歌手，應該會係一位出色嘅牙醫，12年佢喺港大牙醫系學士畢業，亦喺叔叔牙醫診所工作，師姐連詩雅都話想搵佢幫手洗牙。
林作
娛樂圈除咗牙醫，仲有律師。林作就係表表者，佢曾經有大律師資格，今年4月正式獲法庭頒令除名，o依家係遵理學校嘅補習名師，亦係ViuTV節目主持。林作放棄做大律師，應該好有志向，早幾日佢就話DES出爐狀元，唔應該淨係做醫生，如果可以為社會付出，就有好好多。
李家仁
正職係兒科醫生，不過講起佢，一定會諗起佢嘅傑作《小明上廣州》，呢個系列仲出埋碟，包括小明系列始祖《小明坐火車》，仲有《小明去東莞》、《小明遊深圳》、《小明上方舟》等等，小明幾咁郊遊廣闊，真係聽歌都知。
Ben Sir歐陽偉豪
呢位中文大學高級講師，呢幾年入晒屋，喺節目中以輕鬆搞笑手法教廣東話同粗口等等，填補咗好多香港人想知但又唔敢問嘅常識。上個月佢仲再進一步，喺九展開咗幾場talk show。