今夏轉會市場百物騰貴，不過曼城勝在有錢就可以任性。據報，藍月已經同熱刺達成轉會協議，以天價5,000萬鎊（約5億港元）收購後者嘅右閘基爾獲加，令佢成為英超史上最貴後衞，組成億億聲嘅防線；唔怪得足智彩周五開嘅新季英超冠軍賠率，曼城成為2.35倍大熱啦。
原本一路盛傳曼城主帥哥迪奧拿喺右閘位置嘅頭號目標，係上季效力祖雲達斯嘅丹尼爾，不過呢位巴西老將請藍月食檸檬，決定過檔巴黎聖日耳門；搞到哥帥慌慌地咁，半億都照畀熱刺，去買基爾獲加。據報27歲嘅佢將會喺周五到曼市進行體測，預計喺出發美國踢熱身賽前就會搞掂；呢單交易亦會追平車路士喺2014年將大衛雷斯賣畀巴黎聖日耳門，世界最貴後衞嘅轉會費紀錄。
貴價後衞首季嚇親人
雖然堂堂英格蘭國家隊正選右閘，但基爾獲加身價成5,000萬鎊，實在有唔少水份。其實曼城近幾年買後衞一向冇手軟，2015年哥帥未嚟嗰陣，就以3,790萬鎊買奧達文迪；上年哥帥入主後，即同4,750萬鎊豪購史東斯，之後又花1,500萬鎊買門將哥迪奧巴禾，呢三位後防球員有個共通點，就係喺加盟後第一個球季嘅表現都好唔掂。
到咗今年，哥帥之前已經花咗3,400萬鎊，由賓菲加收購門將摩拉斯艾達臣，家下又燒半億鎊買基爾獲加，啲錢好似倒水咁。藍月上季結束後，決定唔同基捷基治續約，𠵱家左閘位得返高拉洛夫，又睇睇會用幾多錢買新兵啦。計埋基爾獲加，單係曼城喺今夏已經用咗近1.4億鎊買人，難怪外界估計今年英超好大機會破去夏轉會總支出紀錄，上年20支球隊一共花咗11.7億鎊。
獲加五年前勁寸城迷
基爾獲加離開上季英超亞軍過檔曼城，肯定會有唔少非議。當轉會消息傳出冇耐，就有網人摷番佢喺五年前嘅twitter留言，喺熱刺作客臨完場失波作客輸畀曼城場波後，勁寸曼城球迷係勝利球迷。
熱刺咁放心賣基爾獲加，除咗因為喺呢位有另一位英格蘭國腳捷比亞之外，原來已經有另一個基爾獲加；青年軍嘅基爾獲加彼得斯（Kyle Walker-Peters）一樣係踢右閘。20歲嘅基爾獲加彼得斯今夏代表U20「幼獅」贏得世青盃冠軍，前途無可限量呀。
