周四幫新球會入波嘅英超兵，又點止阿仙奴前鋒拿卡錫迪吖？重返愛華頓嘅朗尼力求擺脫「月巴」污名，二次為母會「地標」射入一個離門超過30碼嘅靚遠射，協助拖肥以2:1擊敗非洲肯雅球隊高瑪希亞。朗尼13年後重返愛華頓，當然面目全非，新隊友轉晒卡拉臣、盧卡文等人，不過就冇乜影響到佢發揮；35分鐘朗尼一個轉身，離門超過30碼勁射入網，真係有啲昔日當「弗」嗰陣嘅影子。
雖然高瑪希亞半場前一度追平，但愛華頓下半場由中場基蘭杜維爾建功，最終以2:1勝出。朗尼今次愛回家總算有好開始，佢賽後話：「再次為愛華頓入波嘅感覺好好！當我知道轉會即將發生，呢幾個禮拜已經想像入波呢件事會發生。」另外，有傳喺三月幫阿根廷出戰嗰陣半月板撕裂嘅後衞拉美路富尼斯摩利康復進展唔理想，可能要唞多一排，所以愛華頓要被逼出手買後衞。
