關於關愛座，有人話係批鬥座。因為坐喺關愛座嘅人，最好係老人家，頂多係細路仔，再其次係（明顯大肚嘅）孕婦，否則，坐咗上去，輕則被人勸告起身，嚴重啲則被人拍片放上網絡公審，亦有人因此口角打交，或者受傷送院。
呢啲唔係普通巿民嘅事，去年初網上就流傳一段片，片中霍建華喺內地搭機場接駁車，同其他乘客一齊逼喺門邊，當佢見到有粉絲坐咗喺關愛座（亦稱作博愛座）時，霍建華就訓示粉絲要讓座，該粉絲話當時冇人坐，但霍建華再一臉嚴肅咁話對方：「沒有人坐你也得讓啊。」最後粉絲當然有聽偶像話，仲有網民讚霍建華係「男朋友的臉，卻操着教導主任的心」。