前日因唔批准泛民休會辯論劉曉波事件，被泛民議員炮轟嘅立法會主席梁君彥噚日開年結記者會，被問到點睇任內俾咁多議員批評同過去一年表現時，梁君彥就拒絕自我評分，仲搞gag話：「我唔係老鼠，唔會跌落天秤秤自己。」佢話要由傳媒同公眾評價喎。
問到佢過去一年主持會議時，要多次休會後先做到裁決，係咪「唔熟書」，梁君彥就解釋，每屆立會主席都有唔同挑戰，除咗社會變，議員亦唔同咗，指今屆議員「創意或比過去更高」，亦有可能因為佢「真係冇前主席（曾鈺成）咁叻」，所以處理問題時要更小心，要先同立法會團隊傾清楚。
梁君彥噚日又透露，過去一年立會開咗33次會，總時數為407小時，議員要求點算法定人數所用時間為16小時，八方計番條數，其實佔開會4%時間都冇喎。