法庭噚日DQ咗梁國雄、姚松炎、羅冠聰、劉小麗嘅立會議席，話就話會上訴但勝負難料，佢哋立會最後發言講乜呢？
立法會財委會原本定咗噚日開4節共8小時會，一開波係傾港鐵南港島綫追加撥款申請，姚松炎一早已現身財委會，佢冇受可能被DQ影響，係咁批評財庫局計錯數，要政府清楚交代價格調整因素數字等，後來主席陳健波都出聲，話佢已提問成10次，姚忍唔住自嘲，話大家明白點解政府唔想佢留喺立法會啦！
至於長毛亦有出席財委會，佢噚日穿上印有劉曉波和劉霞肖像嘅T恤，追問南港島綫數據時，都忍唔住話唔知自己仲可唔可以監察政府，希望立會帳委會能去信審計署查一查港鐵呢啲爛數。而小麗同羅冠聰分別喺會議開始後40分鐘同1.5小時後現身，羅不滿政府經常向港鐵送大禮，白白送幾百億畀港鐵。